ibrahim ahmed

1


ف مرة قولت اعمل حكيم الزمان


ولعت أعواد البخور ولبست كام قفطان


ووقفت اتمتم بكلام مانيش فاهمه


والخلق متاخدين ونا صدقت نفسى كمان


2


هى السما من فوق ولا السما من تحت


ونا واقف دماغى لفوق ولا دماغى لتحت


سؤال عبيط كل يوم بسأله


لو كنت عارف اجابته كنت ارتحت


3


مرة ابتسمت من قلبى فاكر انا مرة


وبكيت على حالى يجى ستميت مرة


بس العجيب مش فاكر بكيت أنا ليه


ولا فاكر انى ضحكت بالمرة


4


ياللى غويت الصباح دق الشعاع بابك


مليت أنا م الجراح والغربة ف غيابك


بكرة يطل القدر وتنطلق الاجراس


بعد العجز والوهن هترد لشبابك


5


دخلت سيرك الحياة ودورى كان بهلوان


ألعب وأتنطط واشخبط ع الحيطان


أرسم حياة مبهجة وقلبى كان للبشر


ينبوع محبة بس أنا عطشان


6


بتحبنى ..؟ والله مش عارف


حلوة أنا ..؟ والله مش شايف


بس عارفة الأكيد إنى


بخاف منك...؟ والله أنا خايف


7


حضنك حنان ولا حضنك شوك


ونا صحيح منك ولا انا صعلوك


بابك براح للغريب دايما


وف وشى بابك ع الدوام مسكوك


8


الغراب الحكيم حفر لاخوه قبره


وقف يلقن ابن ادم ويعلمه سره


حفر ودارى اخوه فى التراب باديه


مادريش إنه بنفسه فتش لنا سره


9

انتظرتك كتير وادينى جانى الرد
دمك ودمى من نفس الوريد والنبض
من قلب قلب الهوى ماشين سوا فى الحياة
ادم ده اسمك والمعنى هو الخلد

10

يانخلتين فى العلالى يابلحهم نقى


محفورة هناك اسامينا متزوقه


النخل طارح فى العلالى صحيح


انما الفين خسارة النخل طارح شقا


11


الحبيب قال للحبيب بتحبنى قد إيه


رد الحبيب ع الحبيب لكن بطرف عنيه


الحبيب ميل ع الحبيب إياه

بص الحبيب للحبيب ماجوبش تانى عليه