استفسارات يسالها الجميع

[ندا منير]

كتير ناس بتسالنا عن اسئلة محددة خاصة بالجمعية فانا هكتبها عشان لو حد عايز يعرف تفاصيلها :

فى الاول احنا كل يوم فى الجمعية من 10 ل 8 ما عدا الجمعة

1 - يعنى ايه مركز الاستشارات ؟؟

دا مركز استشارات نفسية واسرية خاص بمشاكل نفسية او مشاكل اسرية او مشاكل للاطفال زى مثلا العنف السرقة التبول اللاإرادى يعنى كل ما يخص مشاكل الاطفال يعنى اى حد عنده مشكلة نفسية او خاصة بطفل ممكن يجى الجمعية اما يتصل بالخط الساخن للمركز 5596 واللى مسئولة عن دا استاذ دكتورة امانى عبد المقصود استاذ الصحة والارشاد النفسى ورئيس قسم العلوم التربوية والنفسية جامعة المنوفية .




2 - يعنى ايه معارض دعايا ؟؟

دى معارض بنعملها فى النادى الاجتماعى او الرواد بنعرف الناس بينا وباهداف الجمعية واحتياجاتنا والانشطة الخاصة بينا وبنعرض داتا شو عنها ولو فى حملة احنا بنبقى عاملينها بنستكملها واحيانا بنبيع منتجات فيه بيكون شغل يدوى واكسسوارات وبنعلن فيه عن ا ى نشاط جديد هنعمله .



3 - ايه الفرق بين العضو بين المتطوع او ازاى اشترك فى الجمعية ؟؟

مفيش فرق بين عضو ومتطوع الا فى حاجتين ان العضو لازم يكون فوق ال 18 سنة وبيدفع اول مرة 148 جنيه بس وبعد كدة كل سنة 48 جنيه بس اشتراك سنوى وبيكون له الحق بعد كدة فى انه يرشح نفسه فى مجلس ادارة الجمعية والمبلغ دا مساهمة منه للايتام
بس دا الفرق بين العضو والمتطوع والاتنين مش ملزمين لا انه ميجوا فى وقت محدد ولا يعملوا انشطة محددة كل واحد اللى يحب يعمله بيعمله

وطبعا الاشتراك عادى جدا اما يجى يملى استمارة تطوع او عضوية ويجى براحته يمارس النشاط اللى حابه فى الوقت اللى حابه

والحمدلله دلوقتى وصل عدد الاعضاء 45 عضو و 185 متطوع .




4 - ايه نظام التبرعات عندكم ؟؟

احنا بنقبل جميع التبرعات مادية او مواد غذائية سكر زيت وهكذا بطاطين ملابس اثاث ورق كتب كل حاجة وطبعا فيه ايصالات بنديها للمتبرع سواء كانت تبرعات مادية او عينية والتبرعات المادية دى بتدخل البنك للايتام .



5 - هل بتعالجوا حالات مرضية ؟؟

اه بنحاول نوصلهم لدكاترة يعالجوهم مجانى .



6 - ايه نظام دار الايتام عندكم ؟؟

الحمدلله احنا معانا رخصة وتصريح الدار ومعانا المبلغ كامل اللى هو كان مطلوب عشان الاطفال يجوا واتعمل للدار معاينة فاضل بس معاينة اخيرة وهيجوا الاطفال يعنى قريب قوى وهيجوا وبنستقبل جميع التبرعات الخاصة بيهم وطبعا ان شاء الله فى امهات خاصة جدا مدربين على تربية الاطفال هيرعوهم يعنى واخدين كورسات ودورات فى تربيتهم
بالاضافة الى تجهيز برامج تحت اشراف دكتورة امانى خاصة بالامهات دى لتربيتهم تربية سليمة على اساس تربية نفسية سليمة وبرامج اخرى للاطفال .



7 - ايه الانشطة الحالية عندكم ؟؟

دا لينك فيه الانشطة الحالية

http://www.10-ramadan.com/VB/showthread.php?p=30027

ودا تقريبا الاسئةل المتكررة ولو حد عنده ا ىاستفسار ممكن يضيفه هنا

والجمعي ةبترحب باى حد فى اى عمر

[ayota]

حلوه اوى ياندى الفكرة دى عشان الكل يعرف كل حاجه عن الجمعية لان فى ناس بتتحرج تسأل
كده احسن واسهل للكل...
ميرسى يانودى على تعبك ياجميل
وربنا يوفقك ويوفقك الجمعية يارب

[ندا منير]

حلوه اوى ياندى الفكرة دى عشان الكل يعرف كل حاجه عن الجمعية لان فى ناس بتتحرج تسأل
كده احسن واسهل للكل...
ميرسى يانودى على تعبك ياجميل
وربنا يوفقك ويوفقك الجمعية يارب

لا يا حبيبتى تعب ايه بس

ميرسى ليكى يا قمر