لو بتحب العاشر ؟-------- بص و شارك

[first knight]

ليه العاشر اتسحب منها البساط وليه 6اكتوبر دلوقتي واخده كل الكلام هي والتجمع الخامس وكل المشاريع والهايبرماركتس والجامعات الخاصه والنوادي الكبرى؟ هل العيب في الموقع ولا الحكومه ولا تخطيط البلد ولا كتر المصانع ولا الاعلام----------------- طب ايه الحل ونسوق لبلدنا ازاي ولا رايكو نمشي على هوا الحكومه ونسيب البلد ونشوف غيرها؟؟؟؟؟؟؟؟؟؟؟؟

[Dr Mono]

السلام عليكم ورحمة الله وبركاته


طبعا ده بسبب بعد العاشر عن القاهرة ،مقارنة ب 6 اكتوبر او التجمع الخامس .


غير ان العاشر من رمضان تحتاح الي تركيز من الاعلام ..لكن لوجينا بصينا الاعلام هيركز علي ايه ..غير المصانع !!
لكن 6 اكتوبر بها دريم بارك والماجيك لاند صاحب فضل كبير في شهرة المدينة اعلاميا !!


غير ان في حاجة مهمة كمان ..كل اغنياء مصر يفضلوون السكن في القاهرة او بجوار القاهرة لذلك نجد القصور والقيلل
والمستويات الراقية في 6 اكتوبر والتجمع الخامس وبالتالي يأتي ذكاء المستثمرين في بناء الجامعات الخاصة والاندية الكبري التي تخدم اهالي تلك المناطق والقاهرة ايضا لانها قريبة .


وبالنسبة لاقتراح تسويق للمدينة ...ممكن نعمل احتفالات في يوم 10 رمضان وتكون احتفالات كبري وتسوق لها اعلاميا
ونتكلم عن تاريخ 10 رمضان والانتصار اللي حققناه وكده .... وعلي فكرة كان بيحصل زمان احتفال وكان بتشارك فيه المصانع وطلاب المدارس وكان بيكون في الشارع الاساسي بتاع المدينة ( شارع دولسي) واللي في العاشر من زمان يعرف الكلام ده كويس!!


واخير ا اعتقد ان العاشر تحتاج الي جهد دءووب ومنظم للارتقاء بها ...كمثال كانت في محاولة لتسمية الشوارع بالعاشر ولكنها باءت باالفشل والجهاز ريح دماغه بعدها ...العاشر تحتاج جهد دءووب ومستمر ورؤية صحيحة !

[first knight]

احترم رايك جدا ولكن اسمحلي ببعض التعليقات:
اولا 6اكتوبر بعيده جدا عن نص البلد (برغم انها اقرب من العاشر شويه) وهي من الداخل اسوا من العاشر في التخطيط.
الاراضي بين 6اكتوبر و الجيزه هي التي تم عمل القرى السياحيه بها والحقوها في التسميه ب6اكتوبر.
سكن السيد رئيس الوزراء الحالي بالقرب منها ساهم في التسويق لها في حين ان:
عزوف مستثمري العاشر عن السكن بها زاد الطين بله.
الحاق مدينه العاشر بمديريات محافظه الشرقيه التي تعاني من مشاكل في المياه والمواصلات والصرف الصحي والطرق اثر بالسلب على تطور المدينه وانتقال كل ما هو مميز لها اضافه لسحب دخل العاشر للصرف على الشرقيه حيث وصلت دراسات المركز القومي للاحصاءالي ان محافظه الشرقيه هي واحده من افقر 3 محافظات في مصر، وكنت اتمنى لو ان العاشر محافظه مستقله او تابعه لمحافظه القاهره او الاسماعيليه.
سكوتنا على مشاكلنا نحن سكان العاشر وعدم الحاحنا على المسؤولين لاستكمال مشاريع العاشر الكبري مثل المترو للقاهره.
عدم وجود رؤيه تسويقيه واضحه لاصحاب المولات في العاشر لاستقدام المشاريع العملاقه مثل كارفور او السينيمات الكبرى و توكيلات المطاعم العالميه وغيرها.
عدم قيام المعهد التكنولوجي والجمعيات الاهليه بالتسويق للمدينه.
فساد وتخلف بعض القيادات في جهاز العاشر التي طفشت الكثير من مشروعات عن العاشر (والجدع يرد)
اخيرا اوصي الجميع بالتسويق للمدينه في كل مكان لان هوه ده التحدي الحقيقي اللي قدامنا وانا عن نفسي براسل وبسعى ان مترو ماركت يفتح في العاشر لانها مش اقل من اي حته-----------

[Dr Mono]

لو كارفور او مشروع عملاق فتح هنا في العاشر ،، مين اللي هيشتري منه ؟؟؟

كثافة االمدينة السكانية ، ومستوي المعيشة العام ، لايخدم مشروع عملاق

والمستثمرين الكبار عارفين ده كويس ،،

الكلام ده ينطبق علي الايام المعاصرة ،

دلوقتي في مثلن مطعم مؤمن وفي شبراوي ....ده لسة قريب مكملوش سنة


لكن فيما بعد من يدري ربما يكون هيلتون وشيراتون


وانا أعتقد انها مسألة وقت .

أما بالنسبة لمشروع مترو بين عين شمس والعاشر

تابع معي ما نشر في جريد المصري اليوم

يتبع

[Dr Mono]

وزير: ندرس ربط عين شمس مع العاشر بخطوط سكك حديدية

كتب منار خاطر ١٩/٦/٢٠٠٨
قرر الدكتور عبدالعظيم وزير، محافظ القاهرة، تشكيل لجنة لدراسة المشروع المقدم من وزارة النقل، لتطوير خط سكة حديد يمتد من عين شمس الي مدينة بلبيس، مرورا بمدينة العاشر من رمضان.

ويرأس اللجنة المهندس مختار الحملاوي، نائب المحافظ للمنطقة الشرقية، وتضم في عضويتها: مديرية الطرق والمرور وجهاز هندسة وتخطيط المرور ومركز معلومات شبكات المرافق.

وقال وزير إنه ستتم إعادة استغلال الخط القائم، وهو مسار فردي بإعادة ازدواجه وإنشاء محطات لخدمة الركاب، علي أن تمتد مرحلته الأولي من عين شمس إلي مدينة العاشر من رمضان، وتخدم ١٧٠ ألف راكب في اليوم، موضحا أن المشروع يتضمن غلق جميع المزلقانات وإنشاء أعمال صناعية عليها لعزل خط السكة الحديد عن مسارات الحركة المرورية،

وتوفير قطارات ووحدات جديدة ومستودعات وجميع نقاط التشغيل اللازمة وإقامة محطات بطول الخط المزدوج المقترح، الذي يبلغ ٧٠ كيلو متراً من عين شمس إلي الروبيكي والعاشر من رمضان، ثم إلي بلبيس بحوالي ٣٠ كيلو متراً أخري.

وطالب المحافظ بضرورة ربط هذا المشروع بخطوط مترو الأنفاق، مما يساهم في تخفيف الحركة المرورية عن الطرق البرية، وأن تقوم اللجنة بدراسة جميع مراحل المشروع علي الطبيعة، لتحديد أي عوائق أو مشكلات وإعداد المقترحات والبدائل المناسبة لحلها.

من جانبه قال المهندس محمد جمال الدين، مستشار وزارة النقل رئيس وحدة شراكة القطاعين العام والخاص، إنه يجري حاليا التعامل مع المشروع من خلال مكاتب استشارية عالمية، مشيرا إلي أن عدد القطارات التي تعمل عليه حاليا ٦ قطارات، وأن زمن التقاطر، بعد التطوير، سيكون بمعدل قطار كل عشر دقائق.


نقلا عن جريدة المصر اليوم http://www.almasry-alyoum.com/articl...ticleID=109836

[yassoforte]

بصراحة انت يا Dr mono و يا first knightما سيبتوش حاجة تتقال ولكن طول ما العاشر تابعة لمحافظة حتفضل كده ياريت ترجع زى زمان مستقلة ويبقى ملاكى العاشر و اجرة العاشر الله اعلم لمصلحة مين تفضل تابعة للشرقية و اشمعنة هى متعملتش محافظة زى الى اقل منها

[first knight]

رائعين شباب، لابد يكون لنا دور عن طريق:
الاتصال وتوصيل الافكار دي لرئيس جمعيه المستثمرين ومجلس الامناء وغيرها وهما يوصلو للكبار.
كتاب الجرايد الحكوميه الكبار لهم ايميلات ممكن نراسلهم باسم المنتدى ينشروا افكارنا وطلبتنا.(ممكن يا مديرنا العام؟).
موقع الجهاز ورئيسه لازم يتملي رسايل وطلبات.
لو حد عنده افكار يقول

[m_ashraf]

رائعين شباب، لابد يكون لنا دور عن طريق:
الاتصال وتوصيل الافكار دي لرئيس جمعيه المستثمرين ومجلس الامناء وغيرها وهما يوصلو للكبار.
كتاب الجرايد الحكوميه الكبار لهم ايميلات ممكن نراسلهم باسم المنتدى ينشروا افكارنا وطلبتنا.(ممكن يا مديرنا العام؟).
موقع الجهاز ورئيسه لازم يتملي رسايل وطلبات.
لو حد عنده افكار يقول

كلام جميل ... بس قبل ما نعمل كدا لازم الأول نشوف هنبعت إيه ولمين؟
ولازم (إيه) يكون موضوع مهم وليه شعبية وله إقتراحات
ولازم (مين) يكون عنده السلطة (بضم السين) والصلاحية والرغبة في التغيير والإستعداد علي الإستماع للجمهور (إللي هوه إحنا)
والسؤال هنا هل المسئولين بيستخدموا الإنترنت علشان نعرف نتواصل معاهم؟
أما بالنسبة للجرايد فأعتقد إن الموضوع ممكن ... يعني لو بعتنالهم إيميلات هينشرولنا ... بس لازم يكون الموضوع يستحق من وجهه نظرهم.

[Dr Mono]

فهمت قصدك ياباشا.....


يعني الحماس لوحده مش كفاية ...المهم التنظيم ..وحسن التصرف ...والمشاركة الجماعية ..الخ


والله انا متفائل ع الاخر من خلال الموقع ده ...هيكون موقع جامد جدا ،، ونعمل شغل كويس قوووي.

ان شاء الله

[first knight]

dh l]يا مديرنا العام: ماالمواضيع والمشاكل عندك كتير من المشاركات، انا بسال هل ممكن مثلا نبعت رساله للاستا> صلاح منتصر في الاهرام باسم المنتدى ولا لا وقيس على كده كل المسؤولين

[first knight]

يا ريت دز مونو تشوفلنا البريد الالكتروني لمنار خاطر اللي في المصري اليوم نشوف منها ابعاد الموضوع

[m_ashraf]

dh l]يا مديرنا العام: ماالمواضيع والمشاكل عندك كتير من المشاركات، انا بسال هل ممكن مثلا نبعت رساله للاستا> صلاح منتصر في الاهرام باسم المنتدى ولا لا وقيس على كده كل المسؤولين

طبعا ممكن وليه لأ
مش كدا وبس
إحنا ممكن نختار كام موضوع مهم ونعمل عليهم إستفتاء
ونبعتهم علي إيميلات الأعضاء وبكدا الموضوع يبقي شعبي
وبنبقي كلنا بنطلب الحل وبنقترحه
وأظن معظم الصحفيين والكتاب بيكتبوا إيميلاتهم في آخر
المقال أو العمود

[first knight]

طب ياريت تقولنا على الخطوات العمليه لتفعيل ذلكو يا ريت قريب واحنا المطلوب هنعمله ان شاء الله

[m_ashraf]

نبعت إيميلات لأعضاء المنتدي ونشوف إيه المشاكل الموجودة وحلولها
وننزل إستفتاء علي المنتدي عن إيه أكبر مشكلة تهمنا وعايزين نوصلها للجرايد
نشوف عايزين ننزلها في أنهي جرنال ومع أنهي صحفي أو كاتب
ونجيب الميل بتاعه ونبعتله الموضوع ويبقي كدا الموضوع إتبعت بإسم أبناء العاشر بجد
ولا إيه رأيكو؟

[first knight]

برافو، يا ريت تبدا بموضوع المحافظه المستقله للعاشر ، وموضوع المترو اللي واقف ده، يلا احنا معاك

[first knight]

وهايبر وان اللي خد الارض دا كمان وسايبها خرابه، عايزين نوصله(لهم عنوان اليكتروني باسمهم) وكمان مترو ماركت واي حاجه ممكن تجيب خدمات و تطور للمدينه

[E_s_m_m]

بصراحة العاشر حلوة بجد بس المشكلة في الناس اللي فيها
خصوصا اللي مش حاسين بالنعمة اللي هما فيها
مثلا تلاقي الواحد بيجمل البيت بتاعه ولكن للاسف بدون مايحافظوا علي المكان اللي حواليهم

[E_s_m_m]

يعني علشان نحافظ عليها لازم نبدأ من توعية أهلها

[Dr Mono]

نوعية اهلها ....ههههههههههههه


علي اساس ان في نوع بلدي ونوع سكري ....علي فكرة كله برتقال

وأي مكان في حلو وفي وحش ...

حتي القاهرة اللي الكل بيتباهي انه منها أو حتي الاسكندرية .

أو حتي ال 26 محافظة مفيش محافظة او مدينة برفكت .....

[fagr_ibnybetak]

موضوع اكثر من رائع ولكنة يحتاج الى تفعيل اكثر

نريد تفعيل دورنا نحن اولا لجمع وصياغة هذة المطالب
نريد تفعيل دور اعضاء مجلس الشعب فى هذا الموضوع السيد محمود خميس والسيد صلاح شويخ
نريد تفعيل دور المهندس عبدالحكم رئيس الجهاز فهو رجل خلوق ويحب هذة المشاركات ومكتبة مفتوح للجميع لعلم فأنا ذاهب اليه غدا الاحد لعرض بعض مشاكل المدينة علية ويمكننى اضافة ما ترونة مناسبا عليها
يوجد اقتراح لدى لعرض مشاكل وطلبات المدينة على الصحفيين والمسئولين الا وهى ارسال ايميلات بكثافة الى كل الصحفيين والمسئولين وذلك يكون بصورة جماعية من كل الاعضاء مع المحافظة على وضع الايميلات فى خانة Bcc حتى يشعر الصحفى او المسئول بالخصوصية توجد لدى قائمة بجميع ايميلات الصحفين والمسئولين سأقوم بسردها ان شاء الله بعد توحيد مطالبنا ويوجد معى ايضا بعض ارقام للمعدين من برنامج العاشرة مساءا والبيت بيتك وقناة الساعة الفضائية
وسوف أأخذ نسخة ان شاء الله من هذة المطاب لعرضها على السادة اعضاء مجلس الشعب وسوف اذهب اليهم بالتنسيق معكم وحضور اكبر عدد من اعضاء منتدى العاشر من رمضان حتى تصبح مطالبنا مطالب جماعية وليست فردية

وفى النهاية احب ان اشكركم على هذا الموضوع الاكثر من رائع

مع خالص تحياتى

عبدالرحمن محمد
0108046726

[first knight]

رائع جدا اشتراكك و مشاركتك وانت اكيد اضافه قويه للمنتدى واحب انوه للمدير العام و د مونو بسرعه نشر ملصقات الدعايه للمنتدى عشان نكسب قوى جديده في المنتدي

[fagr_ibnybetak]

اية يا جماعة انتوا سكتوا على الموضوع المهم دة ليه انتوا مش عايزين تنموا مدينتنا ولا ايه

عايزين الحماس بتاعكو يرجع تانى ونخطط صح للى عايزين نعملة وانا بقولكوا مستعد معاكوا لتوصيل صوتكوا لأى مسئول او اى اعلامى

يلا بقى عايزين العاشر قلعة الصناعة تكون احسن مدينة فى مصر
وان شاء الله تبقى احسن محافظة بعد كدة

عبدالرحمن محمد
0108046726

[hamo_amh]

هاى شباب
على فكرة انا لسة مشترك جديد وده اول مشاركة لى على المنتدى لكن الموضوع ده جميل جدااااااااااااااوشجعنى اننى اكتب لكم بصراحة انا شايف ان كل الافكار اللى انتو بتتكلمو عليها كويسة جدااوفعلا مهمة للعاشر لكن انا شايف اننا لازم نشيل كل الافكار اللى متعلقة بالحكومة او بمعنى اصح اللى الحكومة من المفروض انها تدعمها زى المتروو لان مشروع زى المترو ده مشروع مش سهل يعنى مش فى يوم وليلة ولا حتى فى خمس سنين ابسط مثال بصو على الخط الثالث للمترو وانتو هتعرفو انا قصدى اية لان الخط ده يمكن يكون نصف المسافة اللى هتعمل لو من العاشر الى القاهرة ومع ذلك هيتنفذ فى عشر سنين والتكلفة (حدث ولاحرج ) البرلمان المصرى استدان من فرنسا على شان الخط ده يتبنى واللى مش مصدق كلامى يقراء جرايد او يبحث على النت وثانيا العاشر اصلا لما اتخططت سنة 1982 تقرر عمل خط سكك حديدية فيها لكن ده هيكون فى المرحلة ال 12 منها وللعلم فقط العاشر تم تحطيطها عل انها خطة خمسينية ( خمسين سنة ) والى يومنا هذا تم ينا نصفها فقط ثمانية احياء من الستة عشر حى ( انا اقصد حى وليس مجاورة )وده كلو فى الفترة من 1983 الى 2008 بالظبط 25 سنة وعلى شان كدة تم البداء فى مشروع الحى التاسع فى هذا العام وكان بداينة مشروع ابنى بيتك اكيد كلكو تعرفو يعنى فى حاجات كتير جداااااااا فى العاشر هى فى الحقيقة اتخطط لكنها لسة ما اتبنتش كتيرررررررررررررررررررررررر والحكومة مصرة على انها تمشى فى خطواطها البطيئة على شات كدة انا نشايف اننا الزم نشجه الاستثمارات الخاصة وما شابة ذلك وعلى فكرة اهم الاسباب اللى خلت العاشر فى مرتبة متاخرة من حيث المرافق والبنية الداخلية ليها مقارنة بالمدن الصناعية التانية هو انتسابها الى محافظة الشرقيةلان لو انت تعرفو كويس انا العاشر بتاثر لوحدها بنسبة تقارب من 20 % من دخل الضرائب المصرية لكن المحافظة بتتططع جزاء كبير جدا من كل ده فى صالح اعمالاصيانة والانشاءات فى المحافظة كلها و بكدة تكون العاشر هى اللى جابت الفلوس ومطالتش من الرغيف غير الردة ولاحتة لقمة

وللحديث بقية ......
hamo

[Dr Mono]

كلام ذي الفل ...


انا عايز أقول ان العاشر ينقصها..... الروح.
رغم انها هادئة وبها أماكن خالية كبيرة ..تدعو للاسترخاء والتأمل .


لكن

أنظروا الي حال سكان العاشر هل تشعرون ان بينهم ترابط ...هل يوجد جيرة حقيقة ....هل الناس يحبون


العاشر ...هل الناس الساكنين بالعاشر يشعرون بالانتماء لها؟


ياتري احنا ممكن نعمل حاجة نخلي الناس تحب العاشر...،، وتشعر بالانتماء ليها فعلا ؟؟!!!

[**BODY**]

والله موضوع جميل وهايل
وعلي فكره انا عندي فكره بس كبيره شويه
نعرض القضيه علي 90 دقيقه او العاشره مساء
او اي برنامج سياسي والناس الي مع محمود خميس في جمعيه الفجر الجديد تقله علي الموضوع دا وهو هيتصرف وهيوصل صوتنا لمجلس الشعب